رباعيات صلاح جاهين

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا .... و حي بيصير تراب
الأصل هو الموت و اللا الحياه ؟
عجبي !!!
ضريح رخام فيه السعيد اندفن
و حفرة فيها الشريد من غير كفن
مريت عليهم ... قلت ياللعجب
لاتنين ريحتهم ليها نفس العفن
عجبي !!!
ياما صادفت اصحاب و ما صاحبتهمش
و كاسات خمور و شراب و ما شربتهمش
أندم على الفرص اللي أنا سبتهم
و اللا على الفرص اللي ما سبتهمش
عجبي !!!
و الكون ده كيف موجود من غير حدود
و فيه عقارب ليه و تعابين و دود
عالم مجرب فات و قال سلامات
ده ياما فيه سؤالات من غير ردود
عجبي !!!
أنا شاب لكن عمري ولا ألف عام
وحيد ولكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!
يا باب يا مقفول .. ايمتى الدخول
صبرت ياما و اللي يصبر ينول
دقيت سنين .. و الرد يرجعلي : مين ؟
لو كنت عارف مين انا . كنت اقول
عجبي !!!
أحب اعيش و لو في الغابات
أصحى كما ولدتني أمي و ابات
طائر .. حوان .. حشرة .. بشر .. بس اعيش
محلا الحياه .. حتى في هيئة نبات
عجبي !!!
سهير ليالي و ياما لفيت و طفت
و ف ليلة راجع في الظلام قمت شفت
الخوف .. كأنه كلب سد الطريق
و كنت عاوز اقتله .. بس خفت
عجبي !!!
كان فيه زمان سحلية طول فرسخين
كهفين عيونها و خشمها بربخين
ماتت لكين الرعب لم عمره مات
مع انه فات بدل التاريخ تاريخين
عجبي !!!
عجبتني كلمة من كلام الورق
النور شرق من بين حروفها و برق
حبيت اشيلها ف قلبي .. قالت حرام
ده انا كل قلب دخلت فيه اتحرق
عجبي !!!
رقبة قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي !!!
ليه يا حبيبتي ما بيننا دايماً سفر
ده البعد ذنب كبير لا يغتفر
ليه يا حبيبتي ما بيننا دايماً بحور
أعدي بحر ألاقي غيره اتحفر
عجبي !!!




يتبع ..................................................................................

الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش ان الفلاسفة يا هوه
اللي يقولوه بيرجعو يكدبوه
عجبي !!!
على بعد مليون ميل من أرضنا
من الفراغ الكوني بصيت انا
لا شفت فرق بين جبال و بحور
و لا شفت فرق ما بين عذاب و هنا
عجبي !!!
إنسان أيا إنسان ما أجهلك
ما أتفهك في الكون و ما أضألك
شمس و قمر و سدوم و ملايين نجوم
و فاكرها يا موهوم مخلوقة لك
عجبي !!!
نظرت فوق للنجوم و انا ساير
رجليا عترت في الحفر و الحجاير
بقيت اقول و انا ع التراب : يا سلام
مش بس عبرة أخدت لكن عباير
عجبي !!!
يا نجم ليه نورك كده بيرتجف ؟
هو انت قنديل زيت ؟ أو تختلف
- أنا نجم عالي ... بس عالي قوي
و كل ما انظر تحت اخاف اتحدف
عجبي !!!
السم لو كان في الدوا منين يضر؟
و الموت لو عدونا ... منين يسر ؟
حط القلم في الحبر و اكتب كمان
و العبد للشهوات .. منين هو حر ؟
عجبي !!!
وقفت بين شطين على قنطرة
الكدب فين و الصدق فين يا ترى
محتار ح اموت ... الحوت خرج لي و قالي
هو الكلام يتقاس بالمسطرة
عجبي !!!
سرداب في مستشفى الولادة طويل
صرخات عذاب ورا كل باب و عويل
و في الطريق متزوقين البنات
متزوقين للحب و المواويل
عجبي !!!
الدنيا أوضة كبيرة للأنتظار
فيها ابن آدم زيه زي الحمار
الهم واحد ... و الملل مشترك
و مفيش حمار بيحاول الانتحار
عجبي !!!
أيوب رماه البين بكل العلل
سبع سنين مرضان و عنده شلل
الصبر طيب ... صبر أيوب شفاه
بس الأكادة مات بفعل الملل
عجبي !!!
نسمة ربيع لكن بتكوي الوشوش
طيور جميلة بس من غير عشوش
قلوب بتخفق إنما و حدها
هي الحياه كده كلها في الفاشوش
عجبي !!!
يا طير يا عالي ف السما طظ فيك
ما تفتكرش ربنا مصطفيك
برضه بتاكل دود و للطين تعود
تمص فيه يا حلو و يمص فيك
عجبي !!!



يتبع ............................................................................................................................................................................

كروان جريح مضروب شعاع م القمر
سقط من السموات فؤاده انكسر
جريت عليه قطة عشان تبلعه
أتاريه خيال شعراء و مالهوش أثر
عجبي !!!
يللي نصحت الناس بشرب النبيذ
مع بنت حلوة و عود و ضحك و حديث
مش كنت تنصحهم منين يكسبو
ثمن ده كلو ؟ و اللا يمكن نسيت
عجبي !!!
ما حد في الدنيا واخد جزاته
و لا حد بيفكر في غير لذاذاته
ما تعرفيش يا حبيبتي - أنا و انتي مين ؟
إنتي عروس النيل و انا النيل بذاته
عجبي !!!
رقاصة خرسا و رقصة من غير نغم
دنيا .. يا مين يصالحها قبل الندم
ساعتين تهز بوجهها يعني
يترجرجو نهديها يعني نعم
عجبي !!!
إخطفني يللي تحبني ع الحصان
الدنيا قالت يوم في ماضي الزمان
إخطفني يللي تحبني ع الفرس
الدنيا قالت .. قام خطفها الشيطان
عجبي !!!
من بين شقوق الشيش و شقشقت لك
مع شهقة العصافير و زقزقت لك
نهار جديد انا .. قوم نشوف نعمل ايه
أنا قلت يا ح تقتلني يا ح اقتلك
عجبي !!!
جالك أوان و وقفت موقف وجود
يا تجود بده يا قلبي يا بده تجود
ما حد يقدر يبقي على كل شئ
مع ان عجبي كل شئ موجود
عجبي !!!
جالك أوان و عرفت مشي الجنايز
كيف شفتها يا عبد رب اللذايذ
قال : شفت شيل بالحيل فقير أو أمير
كما شالو في الخماير فواضي القزايز
عجبي !!!
أنا كنت شئ و صبحت شئ ثم شئ
شوف ربنا قادر على كل شئ
هز الشجر شواشيه وشوشني قال :
لا بد ما يموت شئ عشان يحيى شئ
عجبي !!!
يا مشرط الجراح أمانة عليك
و انت ف حشايا تبص من حواليك
فيه نقطة سودة ف قلبي بدأت تبان
شيلها كمان .. و الفضل يرجع ليك
عجبي !!!
كيف شفت قلبي و النبي يا طبيب
همد و مات و اللا سامع له دبيب
قاللي : لقيته مختنق بالدموع
و مالوش دوا غير لمسة من ايد حبيب
عجبي !!!
تسلم يا غصن الخوخ يا عود القصب
ييجي الربيع .. تطلع زهورك عجب
و انا ليه بيمضي ربيع و ييجي ربيع
و لسه برضك قلبي حتة خشب
عجبي !!!



يتبع ...................................................................................................................................................................

قلبي عليل يا ناس و في الكاس دواه
مديت له ايدي شربت م اللي حواه
جنبي الشمال خف .. اليمين اتوجع
و ايه يداوي الكبد م اللي كواه
عجبي !!!
دي مذكرات و كتبتها من سنين
في نوته زرقا لون بحور الحنين
عترت فيها ... رميتها في المهملات
و قلت صحيح أما صحيح كلام مخبولين
عجبي !!!
دخل الشتا و قفل البيبان ع البيوت
و جعل شعاع الشمس خيط عنكبوت
و حاجات كتير بتموت في ليل الشتا
لكن حاجات اكتر بترفض تموت
عجبي !!!
- الدنيا من غير الربيع ميته
ورقة شجر ضعفانه و مفتته
- لا يا جدع غلطان تأمل و شوف
زهر الشتا طالع في عز الشتا
عجبي !!!
يا للي انت بيتك قش مفروش بريش
تقوى عليه الريح يصبح مفيش
عجبي عليك حواليك مخالب كبار
و مالكش غير منقار و قادر تعيش
عجبي !!!
سمعت نقطة ميه جوه المحيط
بتقول لنقطة ما تنزليش في الغويط
أخاف عليكي م الغرق .. قلت انا
ده اللي يخاف م الوعد يبقى عبيط
عجبي !!!
بحر الحياه مليان بغرقى الحياه
صرخت خش الموج في حلقي ملاه
قارب نجاة صرخت قالو مفيش
غير بس هو الحب قارب نجاه
عجبي !!!
فارس وحيد جوه الدروع الحديد
رفرف عليه عصفور و قالو نشيد
منين .. منين .. و لفين لفين يا جدع
قال من بعيد و لسه رايح بعيد
عجبي !!!
كان فيه قمر كأنه فرخ حمام
على صغره دق شعاع شق الغمام
أنا كنت حاضر قلت له ينصرك
إشحال لما ح تبقى بدر التمام
عجبي !!!
النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي !!!
صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفة سكرو نسيو الزمن
عجبي !!!
كرباج سعادة و قلبي منه انجلد
رمح كأنه حصان و لف البلد
و رجع لي آخر الليل و سألني .. ليه
خجلان تقول انك سعيد يا ولد
عجبي !!!


يتبع .......................................................................................................................................................................................

شكرا جزيلا

شكرا لمرورك رهام
تحياتي

مزيكا هادية الكون فيها انغمر
و صيف و ليل و عقد فل و سمر
يا هلترى الناس كلهم مبسوطين
و يا هلترى شايفين جمال القمر ؟
عجبي !!!
إنشد يا قلبي غنوتك للجمال
و ارقص ف صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف احتمال
عجبي !!!
آه لو انا و محبوبي جزنا الفضا
في سفينة وحدينا و آشيا رضا
ساعة صفا تعجبنا نرجع لها
و الهم قبل ما ييجي يبقى مضى
عجبي !!!
أنا إله الوجد رب الهيام
أضرب بسهم الوهم وهم الغرام
وهم الغرام من كتر ما هو لذيذ
رشقت انا ف صدري جميع السهام
عجبي !!!
حدوته عن جعران و عن خنفسة
اتقابلو حبو بعض ساعة مسا
و لا قالهم حد اختشو عيب حرام
و لا حد قال دي علاقة متدنسة
عجبي !!!
ياللي عرفت الحب يوم و انطوى
حاسك تقول مشتاق لنبع الهوى
حاسك تقول مشتاق لنبع الغرام
ده الحب .. مين داق منه قطرة ... ارتوى
عجبي !!!
زحام و أبواق سيارات مزعجة
اللي يطولو رصيف يبقى نجا
لو كنت جنبي يا حبيبي أنا
مش كنت اشوف ان الحياه مبهجة
عجبي !!!
إيديا في جيوبي و قلبي طرب
سارح في غربة بس مش مغترب
وحدي لكين ونسان و ماشي كده
و بابتعد ما اعرف ... أو بأقترب
عجبي !!!
يا ميت ندامه ع القلوب الخلا
لا محبة فيها و لا كراهة و لا
حتى يا قلبي الحزن ما عادش فيك
معلهش .. لك يوم برضه راح تتملى
عجبي !!!
مرحب ربيع مرحب ربيع مرحبا
يا طفل ياللي في دمي ناغا و حبا
علشان عيونك يا صغنن هويت
حتى ديدان الأرض و الأغربه
عجبي !!!
فتحت شباكي لشمس الصباح
ما دخلش منه غير عويل الرياح
و فتحت قلبي عشان ابوح بالألم
ما خرجش منه غير محبة و سماح
عجبي !!!
غمست سنك في السواد يا قلم
عشان ما تكتب شعر يقطر ألم
مالك جرالك ايه يا مجنون ... و ليه
رسمت وردة و بيت و قلب و علم
عجبي !!!



يتبع .............................................................................................................................................................................

أنا الذي عمري اشتياق في اشتياق
و قطر داخل في محطة الفراق
قصدت نبع السم و شربت سم
من كتر شوقي و عشمي في الترياق
عجبي !!!
أنا الذي عشت الزمن مضيعة
بروح حزينة معفنة مضعضعة
زرعت شجرة سنط لجل انجرح
لقيتها شعر البنت و مفرعة
عجبي !!!
لو فيه سلام في الأرض و ضمان و أمن
لو كان مفيش و لا فقر و لا خوف و جبن
لو يملك الإنسان مصير كل شئ
أنا كنت اجيب للدنيا ميت ألف إبن
عجبي !!!
العشب طاطا للنسايم و نخ
أخضر طري مالهش في الحسن أخ
عصفور عبيط انا ... غاوي بهجة و غنا
ح انزل هنا ... و انشالله يهبرني فخ
عجبي !!!
أوصيك يا ابني بالقمر و الزهور
أوصيك بليل القاهرة المسحور
و ان جيت في بالك .. إشتري عقد فل
لأي سمرا ... و قبري أوعك تزور
عجبي !!!
غمض عينيك و ارقص بخفة و دلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك ... تقع
عجبي !!!
حاسب من الاحزان و حاسب لها
حاسب على رقابيك من حبلها
راح تنتهي و لا بد راح تنتهي
مش انتهت أحزان من قبلها ؟
عجبي !!!
يأسك و صبرك بين ايديك و انت حر
تيأس ما تيأس الحياه راح تمر
أنا دقت من ده و من ده عجبي لقيت
الصبر مر و برضك اليأس مر
عجبي !!!
ولدي نصحتك لما صوتي اتنبح
ما تخافش من جني و لا من شبح
و ان هب فيك عفريت قتيل اسأله
ما دافعش ليه عن نفسه يوم ما اندبح
عجبي !!!
ولدي إليك بدل البالون ميت بالون
أنفخ و طرقع فيه على كل لون
عساك تشوف بعنيك مصير الرجال
المنفوخين في السترة و البنطلون
عجبي !!!
خوض معركتها زي جدك ما خاض
صالب و قالب شفتك بامتعاض
هي كده .. ما تنولش منخا الأمل
غير بعد صد و رد و اوجاع مخاض
عجبي !!!
كام اشتغلت يا نيل في نحت الصخور
مليون بئونة و ألف مليون هاتور
يا نيل أنا ابن حلال و من خلفتك
و ليه صعيبة عليا بس الأمور
عجبي !!!



يتبع .....................................................................................................................................................

منين اجيب كلمة متألمة
لعيبة فايرة حايرة و مصممة
منين اجيبها كلمة تكون بنت أرض
تشفي اللي ما شافهوش كلام السما
عجبي !!!
أنا قلت كلمة و كان لها معنيين
كما بطن واحدة و توأمين زين و شين
لو دنيا شر ... التوأم الخير يموت
و لو دنيا خير ... الشر ح يعيش منين
عجبي !!!
أنا اللي بالأمر المحال اغتوى
شفت القمر نطيت لفوق في الهوا
طلته ما طلتوش ايه أنا يهمني
و ليه ... ما دام بالنشوى قلبي ارتوى
عجبي !!!
بره القزاز كان غيم و أمطار و برق
ما يهمنيش - أنا قلت - و لا عندي فرق
غيرت رأيي بعد ساعة زمان
و كنت في الشارع .. و في الجزمة خرق
عجبي !!!
عيني رأت مولود على كتف أمه
يصرخ تهنن فيه يصرخ تضمه
يصرخ تقول يا ابنب ما تنطق كلام
ده اللي ما يتكلمش يا كتر همه
عجبي !!!
يا عندليب ما تخافش من غنوتك
قول شكوتك و احكي على بلوتك
الغنوة مش ح تموتك إنما
كتم الغنا هو اللي راح يموتك
عجبي !!!
ياللي بتبحث عن إله تعبده
بحث الغريق عن أي شئ ينجده
الله جميل و عليم و رحمن رحيم
أجمل صفاته ... و انت راح توجده
عجبي !!!
حقرا و فوق كوكب حقير محتقر
في الكون تكون دنياكو ايه يا بقر
رملاية من صحرا ؟ لكين ايش تقول
و الكون بحاله جوه عقل البشر
عجبي !!!
لا تجبر الإنسان و لا تخيره
يكفيه ما فيه من عقل بيحيره
اللي النهارده بيطلبه و يرضاه
هو اللي بكرا ح يشتهي يغيره
عجبي !!!
ياللي في حماه الشمس تلقى الملاذ
و ألف بكره و بكره في ضلوعه لاذ
مين انت ؟ مارد ؟ رب ؟ قال لأ ده بس
أنا اللي بروي القمح و اسقي الفولاذ
عجبي !!!
غسل المسيح قدمك يا حافي القدم
طوبى لمن كانوا عشانك خدم
صنعت لك نعليك أنا يا أخي
مستني ايه .. ما تقوم تدوس العدم
عجبي !!!
البط شال عدى الجبال و البحور
يا ما نفسي أهج .. أحج ويا الطيور
أوصيك يا ربي لما اموت و النبي
ما تودنيش الجنة ... للجنة سور
عجبي !!!


يتبع ...............................................................................................................................